Matthew 13

Vaikala Tovola'i sou Itema Usu'anu Ovu Ngiaxu

(Mak 4:1-9; Luk 8:4-8)

1No anu voxo vilesisi ne la Iesu mulaa muatu no tani ne la mulai muxolu no luaki pa'umolu. 2 ^aLa ta mitema tavu'alo misevile mine'e mixali noxou mole mitataasou, la sou Anu muili'e mutelai no uaxa la mutalupexa no anu, ia ta mitema mita'o no tasi'i ne. 3Anu mua'aloi'a no anu mimii tavu'alo. Ia a'alo latala ne Anu mulailixu no anu vaikala latilovosi, la musokou aloxo 'o. “Ngalomu itema vile mulai no xaixu sou usu'anu ovu ngiaxu. 4La se'i mulapalapau no vote'i, la ta ngiala mine'e mi'ou mukalusi. 5Xe se'i mulapalapau no lia ane lavolavo'o, la mupau palea xo lia ne muxolu se'i teitexisi. 6Ia aso muiei, la muxalo alaxu vilesisi xo uliuli'u ne ulai no lia manina uasi. 7Xe se'i mulapalapau mulu'e no xuxua tanutanu, xe muleme la xuxua mukupokuponu mole unene'a ua. 8Ia se'i ne, mulapalapau mulu'e no lia laixe, la muleme muxali tila mole munene'a. Se'i muxalilixu itemaxu ta'uve, xe se'i itemaxu tatalu, xe se'i la mavulovexa tatalu. 9La sou Anu muvikalane'i aloxo 'o, Itema ane sangalou la anu ulomusou vaikala.”

Iesu Muvikala Vaikala Latilovo Ulai Noxi'a ta Mitema Tavu'alo

(Mak 4:10-12; Luk 8:9-10)

10Ioxe ta molomolo noxou miavuti la milai 'alai noxou no uaxa ne, la mitali'isou aloxo 'o, “Tava'u a loxovaa la sou nini navivikalane'i ta mitema, la navikalane'i no anu vaikala latilovosi 'o?” 11La sou Anu muvikalane'i aloxo 'o, “Ngingi ne Lataua mulosiengixu laaxu vaikala mutalume sou saxisaxila'u noxou. Ia ane'i ne uasi. 12 ^bLa sou lexe itema ane anu muno'u mimii mose'i 'o, la Lataua ulosou mimii se'i la. La anu umomomo sou pa'usou no anu mii vile uasi. Ia lexe itema ane uno'u mii vile uasi, la Lataua uxexeenu mii ma'ia kitu'a se anu muno'u ne. 13Anu tava'u aloxo ne, la sou eni avivikala la, a'oxonu vaikala latilovosi. La sou ane'i imamalei mo imamalei ne ia imaisou mii vile uasi. Mo ilolomu mo ilolomu ne ia ilomusou mii vile uasi. Xe ilavusou mii vile uasi. 14 ^cNoxi'a ta mitema ne la sou anu umomomo sou vaikala noxou Aisaia itema sou palomatana muvikala aloxo 'o,

‘Ngingi ngalolomu mo ngalolomu ne ia umomomo sou ngalavusou laaxu uasi.
Mo ngingi ngamamalei mo ngamamalei ne ia umomomo sou ngatongonu uasi.
15Xo ta mitema ne mitatusou opone'i mo sangali'a kalumo ne mutomutomu
xe ie'i ne seleveenu mukalu la imalei uasi.
Loxo 'o io ie'i laixe xe imalei mo sangali'a laixe sou ilomusou vaikala
xe ilavusou vaikala laaxu la ixiunu opone'i la sou eni apamauline'i.’
16 ^dEni avikalangengi manina lexe tatei la ta mitema sou palomatana tapiena, mo ta mitema 'ilixone'i mulapu tapiena, mo masaxa noxi'a mutila lexe imaisou mii ma'ia ane ngingi ngemaisou xe ilomusou mii ma'ia ane ngingi ngelomusou ne, la uasi. Ia ngingisi nga'osa xo ngingi ngemaisou xe ngelomusou.

Iesu Muvikala Latilovo sou Itema Mupeinu Uiti Ngiaxu no Xai

(Mak 4:13-20; Luk 8:11-15)

18Ioxe ngalomusou vaikala latilovo sou itema usu'anu ovu ngiaxu laaxu. 19Ovu ngiaxu e mulapau no vote'i ne anu aloxo itema e ulomusou vaikala noxou Lataua sou saxisaxila'u noxou ia ulamana no anu uasi, la itema masua une'e uxexeenu no anu xavutalau. 20Xe ovu ngiaxu e mulapau no lavolavo'o ne, anu aloxo itema e ulomusou vaikala noxou Lataua la u'osa sou ulomusousi. 21Ia umulaxu no tanu uasi loxo uli'u ulu'elai uasi. Xe no mine tu'utu'umaxu xe vaikala sevile uto'omolu la anu ulapau alaxu vilesisi. Tava'u xo uli'uli'a uasi, la vaikala ne uxoo maxuveeni uasi. 22 ^eXe ovu ngiaxu ane mulapau no xuxua ne, loxo itema e ulomusou vaikala noxou Lataua ia uxavutala piena no anu mauli ilou xoluxolu no lia 'o, mo umasaxa lexe xavutalau utulu pekia'u no lamoli xe mauli no lialia 'o. La sou mimii ne usu'asou vaikala noxou Lataua la unene'a no anu maulixu uasi. 23Xe ovu ngiaxu ane mulapau no anu lia laixe ne aloxo itema e ulomusou vaikala noxou Lataua la umulaxu no tanu mo mulavusou laaxu. La nene'axu uxali loxo se'i muxalilixu itemaxu ta'uve mutelo no latanu la, xe se'i itemaxu tatalu mutelo no latanu la, se'i la mavulovexa tatalu mutelo no latanu la.”

Vaikala Latilovo sou Uiti Xe Uiti Ane Masua

24Ioxe Iesu muavuti la musolonu vaikala latilovo vile aloxo 'o, “Saxisaxila'u noxou Lataua teitexi no opo loxotolo anu aloxo itema vile mulai mutotou uiti ngiaxu laixe no xai noxou. 25Ia no 'olovoxo vile ane'i miaiai mukalu la, uluau itema ne mune'e mutotou uiti masua ngiaxu no taitaiinu uiti 'ole la mulivu mulai. 26Xe no mine uiti mupau mutelo tatatila xe munene'a la uiti masua 'ole muleme kalumo. 27Ia ta mitema sou xaixai noxou tatananu xai ne mine'e la mitali'isou lexe, ‘Tila, loxovaa nini netotou uitu laixesi no xai? Ia 'ena'ei mutounu uiti masua e muleme kalumo ne?’ 28Anu muavuti la mukoline'i aloxo 'o, ‘Uluaxeni mu'oxonu ane.’ Ioxe ta mitema sou xaixai noxou itema ne miavuti la mitali'isou lexe, ‘Loxovaa nini nemasaxa lexe nexi talai mo takakalau uxexee?’ 29Anu muavuti la muvikalane'i lexe, ‘Mamu xo maasi xe ngingi ngalai ngakakala'u la ngaluvusou uiti kalumo.’ 30Iengi uvaxau uleleme ilou uiti ne mo uiti lingamo. Xe no anu voxo sou kokoli la sou avikalane'i ta mitema e ikokoli ne lexe iluvusou uiti masua ne tei mo ivotunu tavatavalanu mo ilai ipitanu sou u'ela. Xe ukalu, la sou ipitanu uiti la ilai imuxaxu no tani sou la'ilali noxilo.”

Vaikala Latilovo sou Masitati Ngiaxu Xe Isi

(Mak 4:30-32; Luk 13:18-21)

31Iesu musolonu vaivaikala latilovo vile la aloxo 'o, “Saxisaxila'u noxou Lataua ne, aloxo mii e ilemolu lexe masitati ngiaxu. E itema vile muno'u la mutotou no xaixu. 32Masitati ne ngiaxu kitu'a manina no anu mimii iouiou e itotou no xai. Ia itounu xe uleme la uleme toxoxa'a manina, la ua'ulixu la'ilali iouiou e mitounu no xai ne. Avolu ne toxotoxoxa'a mo uialaiala ulai no ale la ta ngiala ine'e mo i'oxonu iomusi'a no avoavolu ne.” 33Mo musolonu vaivaikala noxou no anu vaikala latilovo vile la aloxo 'o. “Saxisaxila'u noxou Lataua ne aloxo isi sevile e sema vile mino'u sou mipitanu mixiunu ilou palaua, la usoxolixu veleti ne uxali toxoxa'a.” 34No anu vaivaikala noxou Iesu ne, la muvivikalane'i ta mitema tavu'alo ne no anu vaikala latilovosi. 35 ^fSou umomomo sou vaikala noxou itema sou palomatana mulemolu tatei aloxo 'o.

“Eni avivikala, la avivikalangengi no anu vaikala latilovo si,
eni avivikalangengi no anu mimii ma'ia ane mutalume tatei
no mine ikoinu tuala xalexalee uao, mune'e muxali vaimomo 'o.”

Iesu Mululusou Laaxu Vaikala Latilovo sou Uiti Xe Uiti Masua

36Ioxe Iesu muavuti, la ta mitema tavu'alo ne mixoxolu ne, ia Anu musuku mulai no nano no tani. Xe ta molomolou miavuti la milutu milai noxou, la mivikalanu, “Nalulusou laaxu vaikala latilovo sou uiti masua e muleme no nano no xai noxixe.” 37Anu muavuti la muvikalane'i aloxo 'o, “Itema e mutotou uiti ngiaxu ne Itema 'Olu. 38Xe xai ne xalexalee tuatuala no lia 'o. Mo uiti ngiaxu ne ane ta mitema e mixolu no nano no anu saxisaxila'u noxou Lataua. Xe uiti masua ne ane Satani ta 'olu. 39Uluau e mune'e mutotou uiti ngiaxu masua ne ane Satani. Mo voxo sou kokoli ne ane voxo kaluxusou. Xe ta mitema sou ikokoli no xai ne ane ta angelo. 40 ^gMo uiti masua e ipitanu sou u'ela no navu ne, anu 'ilixo ane ne uxali no anu voxo kaluxusou aloxo ne. 41 ^hItema 'Olu upalusi'a ta angelo noxou la ixexenu mimii masumasua e u'oxoo masuane'i ta mitema, mo ane'i ane mi'oxonu 'ilixo masumasua ne ixexe no anu saxisaxila'u noxou Lataua teitexi no opo loxotolo. 42 ⁱAne'i ileane'i ulai no navu toxoxa'a. No anu navu ne la ane'i itama xe anaxa'a ukalakiki. 43 ^jIa ane'i ta mitema ane 'ilixone'i mulapu la ixali loxo aso no nano no anu saxisaxila'u noxou Lataua Mamilo. La sou 'ena'ei ane mulavusou lexe sangalou laixe sou ulolomu no anu la anu laixe lexe anu ulomusou vaikala ane 'o.

Vaikala Latilovo sou Poxolusou Mimii Mi'asixu Xe Lasala

44Iesu mululusou vaikala latilovo ne laaxu mukalu, la musolonu vaivaikala noxou no anu vaikala latilovo vile la aloxo 'o. ‘Saxisaxila'u noxou Lataua teitexi no opo loxotolo ne aloxo poxolusou mimii lailaixe e mi'asixu mutalumeiou no lia. Ia itema vile mulai xe muxalisou la musukunu mulai mutalumeiou la. La anu mu'osa misevile xe muavuti la musovanu mimii noxou ne mukalusi. Xe mukalu la mulai sou mulotonu lia xalenu anene.

45Mo Saxisaxila'u noxou Lataua teitexi no opo loxotolo ne anu aloxo lasala laixe e itema vile usosovanu mimii ukakamulinu sou lexe ulotonu. 46Ia mulai xe muxalisou vile lailaixe manina la mulai musovanu mimii noxou mukalusi. La sou anu mulai mulotonu lasala ne.

Vaikala Latilovo sou Vu'o

47Iesu muavuti la musolonu vaivaikala noxou no anu vaikala latilovo vile la aloxo 'o. Saxisaxila'u noxou Lataua teitexi no opo loxotolo ne aloxo vu'o vile ta mitema ivu'ovu'o no anu no luaki. Vu'o ne ileanu ulu'elai no luaki la ta sinana iouiou ine'e i'una no anu. 48Xe vu'o ne u'ana'ana ukalu, la sou ta mitema ne ilapunu uatu no tasi'i, la sou ixolu sou ilevine'i ta sinana. La itaataane'i ta sinana ane ta lailaixe no lakela xe ane ta masumasua la ipeine'i. 49Anu iou vilesisi aloxo ne uxali ili'i no mine tuala xalexaleenu ukalu. La ta angelo ine'e ikalipakane'i ta mitema ta masumasua noxi'a ta mitema ane milapu. 50 ^kLa ileane'i ulai no navu ane toxoxa'a la itatama xe anaxa'a ukalakikiki.’” 51Xe Iesu muavuti la mutali'isi'a lexe, “Loxovaa ngingi ngelavusou vaivaikala latilovo ne laaxu?” La ane'i mikolinu lexe “Ani.” 52Anu muavuti la muvikalane'i lexe, “Aloxo ne la sou ta tisa sou lapuloto ne ane'i milavusou laaxu vaivaikala sou saxisaxila'u noxou Lataua teitexi no opo loxotolo. Ane'i aloxo ta mitema sou isaxila'u tani tatila vile. Ane'i i'una no tani ne la ilaasou mimii lailaixe e mikuponu muai ne uatu. La ilaanu alaalavua, xe teiteinu kalumo.”

Ta Nasaleti Mikusau Iesu

(Mak 6:1-6; Luk 4:16-30)

53No mine Iesu mukalusou vaikala latilovo mukalu la Anu musuku mulai no tualasou ne Nasaleti. 54 ^lAnu mulai muxali no tualasou mukalu la mu'unalai no taasou lalotu noxi'a. Xe ane'i milomusou vaivaikala noxou la mikuluke manina. La mitali'i lexe, “Itema 'o muno'u lavulavu ne'i 'o? Mo tava'u a loxovaa la sou Anu muno'u xavi sou u'oxonu sosovo iouiou 'o? 55 ^mNenge telavusou lexe itema ne Anu itemasou utulusou tani vile 'olu ane, mo nenu ualasie lexe Malia xe ta vimovimou ane Iakovo ilou Iosepu mo Saimoni xe Iudasi. 56Mo ta vimovimou ta sema kalumo ane nenge nenge'a taxoxolu 'o. Ia loxovaa la Anu muno'u xavi sou u'oxonu sosovo 'o?” 57 ⁿLa ane'i ilomuxu uasi. Ia Anu muavuti la muvikalane'i lexe, “Itema sou palomatana ne ta tema tualasou ilo'a ta minuminu no nano no taasou ne ilavusou itoxonu uasisi manina. Ia no tuala va'ava'axusi ne la ta mitema itoxonu misevile.” 58La sou Anu u'oxonu sosovo tavu'alo uasi xo ane'i imuxaxu tane'i noxou uasi.